mäudemi ume mau....

ja aso iz hani scho die..... momänt schnäu..... die sächsti Arbeitswuche hingermr.... u mi zwöit Lohn chunnt o scho gly! *gump* dir gloubets nid, aber so langsam aber sicher füehlemini richtig iigarbeitet u weiss über z alleriallerimeiste bscheid!
Jedefaus gfautsmr definitiv dert u es isch eifach es uh cools Team woni mitne darf zämeschaffe! und d Chind sy eifach (meistens) oder (fasch) immer gaaaanz liebi!!!!
Dä Job gfallt mir mega, ha aber säuber scho gmerkt, dasses nid mi bruef wär... cha nid so rächt erkläre wieso, aber gloube mis Plätzli isch de scho ire andere Ufgab... aber das Jahr isch sicher mega wärtvou, ig lere uh viu sache woni irgendwenn wieder wirde chönne bruuche und ig cha viu erfahrige sammle u no chli euter wärde derbii....! *hehe*oder ig wirde wieder zumene Chind chönnt o sy.... *grübel*
ja, was hani iz no wöue säge???? ah ja genau... aso, ig bi mitlerwile nüm eifach d Stefanie..... ha aso scho es paar Spitznäme becho.... teu sägemr iz Steffi (binimr ja gwöhnt....) aber när gits no die verschiedenste Chinderversione vo mim name: Säffi, Täffäniiii, Steffänii,..... *hehe*
aso.... när bini mau no so gfragt worde, wasi eiglech de so genau mache dert.... drum erkläreni doch das grad mau... aso
wenni am 7ni aafah schaffe, de:
gani zersch zude Bäre ufe, "mini" chind ga hole wo scho da sy vom Früehdienst, nime üsi Wösch, dr Schlüssu zum Pavillon (Wo mir Pinguine sy) u öppe no chli Frücht mit abe.... Dunger müesse zersch au die Chind wo no d Schueh anne hei Finke aalege==> muessme de chlinere no häufe...
när gömr aube füre iz Gäube Zimmer u de düesi afe chli öppis spiele.... ig ga aube no grad bim Schribtisch ga iz Rapportbuech güxle.. dert schribt steit nämlech aube no so chli was am letschte tag no so gange isch, woni villich nid mitbecho ha... när luegi mau, weli Chind de überhoupt genau da sy (wennis nid sowieso scho weiss....) u amche när ufeme Tagesrapport-blatt für jedes Chind es hüseli wome när häreschribt wenn öppis speziells isch.... zB wenn z Chind e Teddy derbii het, oder wenns nid so viu gschlafe het,.......
nachäne gani ga Tee choche füre Tag.... dörfe mängisch d Chind häufe ;) u ja... när no d wösch versorge, u haut fürd Chind da sy... chli luege, dass sie ke seich mache, strit schlichte,.....
Am 8i faht när scho öpper anders dr Dienst aa u de het dr 7ni e haubstund pouse....
Dr 8idienst übernimmt när d Chind u duet de so zwüsche viertuab 8i u haubi 9i mau mit dene wo wei znüüni ässe.... am nüüni, wenn när no die dritti Dienstfrou chunnt, machemr när aube mit de Chind z Kreisli.... womr irgendöppis mit dr Gruppe mache... singe, es spieli,.... u när luegemr mit de Chind was sie am Vormittag mache.... y Garte ga, ga Spaziere, süsch e chline usflug,.... öppe so am 11i geit när öpper vo üs froue dinne ga Tisch decke und d Ligi paratmache.... am haubi 12i chame z ässe ga hole u när duetme mit de Chind zäme ässe....

Nachem zmittag macht dr 7ni d Chuchi, dr 8i duet mit de Chind zähnputze u geit när mit de chlinere Chind uf d Ligi, und dr 9i verzeut de grössere Chind no es Gschichtli u geit när mit dene uf d Ligi u blibt när dinne bis entweder d Chind schlafe oder abglöst wird.... y dere Zit hei när mir froue d Pousene.... aber mindestens öpper blibt immer im Pavi u isch für d Chind da... u när muessme ja no Tische putze u dr Bode wüsche und ufnäh bim Tisch und im iigang.... WCs & Brünneli putze u so....

meistens so gäg die viertuab 2 stöh de die erste Chind wieder uuf... die chöi fürecho u sech aalege... u när no chli spiele.... bi schönem wätter chöi sie när natürlech aube scho mit öpperem chli y garte use.... spetischtens viertuvor 3 bis drüü düemr de die andere Chind ono wecke... wüu am haubi 4i gits scho zVieri.... u am 4i geit när dä wo am 7ni aagfange het scho hei.... die andere zwe blibe no... dr 8i hört am 5i, dr nüüni am 6i.... dä wo am 6i ufhört muess die Chind wo no lenger blibe am Spätdienst abgä... no chli säge was villich d Eutere duet interessiere vom Tag vo ihrem Chind u so....

hm.... jaaa tönt iz villich nacheme rächt lockere Job.... aber isches de scho nid immer! zum biispiel wennd allei bisch und innerhaub vore minute grad drüü chind gränne wüu z einte dr Chopf aagschlage het, z andere vo öpperem isch ghoue worde u z dritte eifach grännet wüuim öpper öppis wäggnoh het.... *hehe* oder wenn dr eint grännet wüuim dr ander öppis wäggnoh het u när sägi är söus zrügggä u när grännet dr ander wos muess zrügggää u gliichzitig söttisch eiglech no e feini "gaggi-windle" entferne und e neui aabringe bime dritte chind.... ;) oder wenn sie anstatt schlafe eifach gränne u chräie wie am Spiess..... tjatja... hets aues scho gä... aber mitlerwile chani o die settige Situatione besser meistere u bi am Aabe nüm soooo mega müed vom Schaffe! :) Mängisch dänki, wenni das aus Bruef würdi mache... irgendwenn wärs mir gloubi längwilig, o wenn jede Tag mit chind spannend isch u so... aber gloube es wär nid mis ding.... u vorauem findis meeeeega truurig, dassi vermuetlech vo kem vo dene Chind jemaus wirde erfahre was usne wird! hamr eismau überleit, wases us dene einzelne Chind mau wird gä, wele bruef sie mau wärde usüebe und wie sie mau wärde sy so aus Teenie oder Junge/i maa/frou....
aber ja... wär weiss.....

sooo... iz hani gloubi wiedermau gnue plapperet.... pfuuset guet u düet nid zwüescht....