Sooodeli.... achtung: das git e länge ytrag....!
Ig muess nämlech für mi Praktiordner e Tagesrückblick über üsi Kitaübernachtig schribe.... und wennis scho ufsetze, wieso nid grad hie, dass dir ou grad no chli öppis dervo heit... ;)
Auso... mir hei vom Fritig ufe Samstig mit de Chind ir Kita übernachtet. 11 Chind wäre aagmäldet gsy, zwöi sy när du nid cho, wüll sie d Masere hei... das heisst es sy no 9 Chind gsy: (I nenne kener ganze näme... nume Buechstabe und Alter)
Auso... ig ha am Fritig no frei gha, wülli no Ferietäg ha, woni no muess yzieh...
Uf die 5e bini när id Kita gange. Bi chli öppis vorde 5e dert gsy und es sy no grad es paar anderi Chind hei, wo am Fritig aube ir Kita sy, zersch d S.....(2) u gly drufabe isch ou dr Papi vor A......(4)& L.....(1) cho. är het aber nume d L.... mitgnoh, wüll d A.... für d Kitaübernachtig da blibe isch.
Ig ha zersch no schnäu d Infos vom Tag gläse vore ufem Pult u bi du när glymau ir Chuchi verschwunde. D Kathrin isch währenddesse mit de grössere Chind veruse y Räge ga dr Grill aaführe, dassmr üsi Znacht-Würstli hei chönne grille. D Karin isch mit dr E.....(2) no dinne blibe.
Ig ha ir Chuchi Gmües gschnitte, dr Salat parat gmacht, Salatsauce gmacht, und ab und zue hani no ar Kathrin es paar Sache zum Fänster usegä, wosie het bruucht zum füüre.
Irgendwenn het no z Mami vom S..... (6) aaglütet und gfragt, ob sie d Jogurt für z Zmorge am Samstig scho hüt aabe chönni bringe.... gly drufabe isch plötzlich öpper uftoucht dusse - e Frou wo nid so rächt gwüsst het ob sie da richtig isch und so... ;) sie het när mau zur Kathrin "Bonjour" gseit... d Kathrin hetse aber nid ghört.... ig ha aber vor Chuchi uus afe mau realisiert, was das ächt fürne Frou isch.... (wüll sie Franz gredt het). Sie het du när nomau "Bonjour" gseit und d Kathrin hets du dasmau ou ghört. d Frou het när gseit: "Je cherche le groupe Pingu - je cherche E....." und d Kathrin hetere erklärt, wo dr Ygang vo üsem Pavi isch. Die Frou het z erste mau d E.... abgholt... isch äuä es Tanti oder so, wo bi ihne z Bsuech isch... oder so..... uf jede Fau isch sie ynecho und ig hare gseit, dass d E.... vore syg...
D Karin het när d E... dere Frou übergä und no churz Rückmäldig gmacht.
När isch scho haubi 6i gsy und d Luana isch ou wieder cho. Sie isch du zu mir ynecho und het zersch no es paar Bastlisache parat gmacht. D Karin het ou no es paar Sache vorbereitet dinne. D Kathrin isch irgendwenn zum Chuchifänster cho und het gfunde, sie möchti gärn es heisses Bad ;)
Wo när öppe viertuvor6i gsy isch, sy scho die erste Chind cho, wo süsch am Fritig nid da sy, wo aber ar Kitaübernachtig hei teilgnoh. Als ersti sy H...(3) und B.... (3) cho. D Karin isch när ou no use y Räge gange, dass d Kathrin nid grad ganz allei isch dusse.
Chli speter isch du ou no dr L... (4) cho. är het afe mau grad chli müesse gränne, wüllsim du doch plötzlich chli komisch isch vorcho, am aabe id Kita z cho ganz alleini u när gö d Mama u dr Papa eifach wieder. Aber är het sich schnäu beruhigt, wo d Luana ihn nach sym Schwizerfanliibli woner annegha het, gfragt het. chli speter isch du ou dr H.... ynecho. Ig binim schnäu ga häufe abzieh, u ha när no ir chuchi fertig gmacht.
Woni mit dr chuchi fertig gsy bi, bini füre iz Gäube zimmer ga mit de Chind luege. Mitlerwile sy scho einigi ynecho gsy und die andere sy ou grad am ynecho gsy. Potz sy die Chind ufgregt und ufdräiht gsy... alles säge, sie sölle nid so wild tue het nüt oder ämu nid wahnsinns viel gnützt. Dr B.... isch sogar scho bim Tisch ga schnouse... häiäiäiäiäi! ;)
Wo du alli Chind sy dinne gsy, heimr no schnäll es Kreisli gmacht zum chli beruhige und wo z ässe isch parat gsy, hei d Chind dörfe ad Tische hocke. Jedes het afe mau e haubi Wurst und Chips und Salat und Gmües übercho - u natürlech Ketchup ;)
Mir hei ganz es gäbigs Znacht gha, es isch mega fein gsy! Nume het dr B.... wo rächts vo mir ghockt isch, immer wieder säuber wölle ga meh Wurst hole, är het irgendwie nid begriffe, wieso d Froue hüt alles bringe und me nid sälber darf ga hole... und är hät am liebste eiglech nume grad Chips und no chlei Wurst gässe... was natürlech ou nid grad so gange isch.... d E..... (2) wo uf dr andere Site näbe mir ghockt isch, het rächt still vorsich häre gässe.... gloube ihre isch z ir Kita schlafe no nid so ganz ghüür gsy....
Nachem znachtässe hei d Chind ihri Bächer dörfe id Chuchi tue, u wieder iz Kreisli hocke. D Kathrin und d Luana hei vom Znachtässe ufgruumt und d Karin und ig sy mit de Chind im Kreisli gsy.... Mir hei Bsuech übercho vom Baski. D Karin het när e Gschicht verzellt vom Baski wo sich es Floss bout het und ufem Fluss isch gsy ga fahre dermit. Es Büechli wo mi a mini Chindheit erinneret het, wüll ig das sälber gha ha! :D
D Luana isch när ou no chli cho lose, wüll sie ou het wölle cho luege, was das fürne Gschicht isch und sie het när no schnäll dr B.... gwicklet wo es Gagi gmacht het gha.
Wo d Gschicht isch fertig gsy, heimr mit dr Magnetwand de Chind zeigt, wiemr d Gruppe ufteile. die chlynere hei füre id Garderobe dörfe ga es Papirschiff aamale zäme mit dr Kathrin und dr Luana. D Karin und ig hei mit de grössere Chind es chlieses Floss bastlet.
Das isch aber garnid so eifach gsy... ig ha zersch am Leo, när am Samuel und dr Anina ghulfe.
Womr mit dere Bastuarbeit sy fertig gsy, hei d Chind vorne ir Garderobe ihres Pijama dörfe ga hole und pischälä, u när no ga zähnputze. die chlinere sy grad zersch gsy ga Zähn putze und när hei ou sie no z Pijama chönne aalege. Isch no speziell gsy, all die Chinder mau im Pijama z gseh :D
Wo alli Chind parat sy gsy für iz Bett, ha ig no e Guetnachtgschicht verzellt. Dr L.... (4), d S..... (2) und d C..... (4) hei no ihre Schoppe trunke derzue. Nachdr Gschicht isch no d Luana uf d Ligi cho und mir hei de Chind no je es Guetnachtliedli gsunge u sy när uf dr Ligi blibe, bis d Chind gschlafe hei. D E.... het am allerischnällste gschlafe... die andere Chind hei alli es bizeli Müeh gha mit yschlafe... sy äuä chli fest ufgfregt gsy ;) D C... het plötzlich no müesse ga bisle und d A... natürlech ou no grad. am schluss heimr no dr L... und d A.... gha wo no nid gschlafe hei. Ig bi bim L.... gsy und d Luana bir A..... Nacheme zitli hetmi dünkt dr L... schlafi iz... und ig ha ou würklech no chli gwartet zum sicher ga, dasser ou würklech schlaft. Woni du bi sicher gsy, dasser schlaft, bini afe use zur Karin und Kathrin wo y dere zit scho am vorbereite sy gsy für z Zmorge mit de Eltere am nächste Morge. Mir hei när no zäme öppis trunke und chli Nüssli gässe und gsprächlet u gwartet bis d Luana ou vor Ligi chunnt. Wo sie cho isch, hetsie verzellt, dass nid d A.... die isch gsy wo am schluss gschlafe het, sonder dass dr L.... doch no nid gschlafe het und sie när no es zitli bi ihm gsy isch, bis ou är gschlafe het. När hei mir Froue zäme no es paar rundine Uno gspielt, bevor ou mir üs y üsi Pijamas gworfe hei, üsi Zähn putzt hei und iz Bett gange sy. D Kathrin isch iz Bastlizimmer gange zude Zwillinge ga schlafe, d Karin, Luana und ig sy zäme uf die anderi Ligi zude rästleche Chind.
Ig ha die ganzi Nacht düre rächt e liechte schlaf gha. Bi immer wieder verwachet, wüll es Chind grännet het, wüll es Chind gredt het im schlaf, oder wüll es Chind irgendwie umegrangtet isch, gschnarchlet het oder weissi was.... Aber d Karin het äuä no weniger gschlafe. Jedesmau wenni wäg öppisem ufgwacht bi, isch d Karin aubescho ufgstande gsy. zum biispiel wo d E.... grännet het, wüll sie abem Mattrazli troolet isch, oder wo dr S.... (6) gfunde het är müessi ga bisle. D S...(2) het im schlafe gredt und vo ihrem Nuggi verzellt und vor Mama ;)
Am andere Morge bini verwachet, wo dr L..... und d C..... grad zur Türe use hei wölle.... ig bi ganz verwirrt gsy und hase gfragt, wo sie häre wöuge....! ersch wo sie mi ganz komisch aagluegt hei, hani gmerkt, dass ja ar Karin ihres Bett scho lär isch und dass äuä morge und zit zum ufstah chönnti sy... ;) Dr L... het när gseit, sis Pijama syg nass und ig bi när mit dene beide ufgstande und ha am L... früschi sache zum aalege gä. När hani du mi sälber ou aagleit.
D Karin isch när mit dene Chind wo scho uf und aagleit gsy sy zude Bäre ufe gange und ig bi gly drufabe mitem L... und dr E.... ou ufe. D Karin isch wieder abe und derfür isch no d Luana mit de räschtleche Chind cho. Mir nei öppe e Stund dobe mit de Chind gspielt. Resp. D Chind hei gspielt und d Luana und ig hei probiert richtig z erwache... ;) D Chind heis gnosse, mau ire andere Umgäbig und mit andere spielsache chönne z spiele und abgseh vo es paarne Strite um spielsache sy sie rächt friedlich gsy.
irgendwenn gäg die nüüne zue isch d Karin ufecho und het gseit, mir sölle ufruume und abecho. Womr sy abecho hei d Karin und Kathrin scho ganz schön z Zmorge parat gmacht gha und es sy ou scho eltere da gsy.
Ig bi du no ga Chäs schnide, während d Karin d Eltere begrüesst het und z Zmorgebuffet als eröffnet erklärt het. Mir Froue hei zersch afe d Eltere und Chind sich la bediene und hei gluegt, dass z Buffet immer schön zwäg isch und dass nüt fählt. När hei ou mir üs mau bedient. Z Kafi isch rächt dringend nötig gsy irgendwie. Ig bi mit dr Luana zäme am Tisch ghockt wo d C.... mit ihrem Mami am Grosi und em Papi ghockt isch und mir hei mit ihne no chli gspräächlet.
Scho gly sy när die erste Eltere wieder gange, chli speter heimr aafah ufruume. Ig ha afe mau üsi Abwäschmaschine so guet wie nume müglech mit Gschirr vollgstopft u när heimr aafah z Buffet abruume, während no die letzte Eltere am a gsy sy. Wo mir wieder nume no z viert gsy sy, heimr no dr räscht ufgruumt. Ig ha d ghulfe sache no y die oberi Chuchi trage und no dert d Maschine aaglah, ghulfe stüehl versorge und när hani no im Pavi d Chuchi fertig ufgruumt, während d Karin, Kathrin und Luana Tische usetreit hei, alles wieder a sy Platz versorget und d Böde putzt hei. Irgendwenn so gäg die haubi 12e sy mir du ou fertig gsy mit ufruume und mir hei z Pavi bschlosse und heinis ufe Heiwäg gmacht.
so.... das wärs gsy vo üsere Kitaübernachtig... u iz muessi würklech iz Bett, süsch schlafi no vorem PC y ;)
es isch iz scho meh als e Wuche här, woni no schnäu (bevori zur Marina gange bi) im Bibupanorama verbii bi und när het ufem Rathuusplatz e Band gspielt, wo mir grad total beiidruckt het! Das het hüüüüne angers geniau grockt! oder weiss ou nid wieme das söu säge.... rock isches ja nid gsy ;)
